Un Núven di Lixu

Un Núven di Lixu

Un núven di lixu sta ta da vólta pa riba kabésa di un minina. Kel-li ta faze-l xinti minina más tristi di mundu. Lé es stória pa bu diskubri modi ki el konsigi liberta di kel núven di lixu.

image

Maria éra kel minina más tristi di mundu.

image

Ningen ka kreba brinka ku Maria pamodi un núven di lixu staba ta da vólta pa riba di se kabésa.

image

Kel núven tinha kaska di laranja, brinkedus kebradu, bólsa di plástiku i txeu móska na se vólta.

image

Ningen ka kreba brinka ku un minina ki tinha un núven di lixu ta da vólta pa riba di se kabésa.

I si algun kuza kai riba bu kabésa? Fórti kuza nojéntu!

image

Maria fla Sónia: "Nu anda djuntu pa skóla." Má Sónia fuji di el.

Na skóla Maria almusa el sô. Ningen ka kria staba djuntu ku el.

image

Mai di Maria sénpri ta flaba el: "Ka bu bota kaska di banana na strada!"

"Bota pakóti vaziu di bolaxa na lixu." 

Má Maria ka ta obiba ku se mai. El ta botaba lixu undi ki el kreba.

image

Un dia se mai fika txeu xatiadu ku el. Se mai fla-l: "Ka ta dura, tudu es lixu ta kumesa ta sigi-u."

image

Na kel otu dia, kantu Maria korda el atxa un núven di lixu ta da vólta pa riba di se kabésa.

image

Maria tenta fuji di kel núven di lixu. Má kel núven ta sigiba el pa tudu lugar.

image

Maria tenta di tudu pa poi kel núven di lixu sai di se bera. Má kel núven di lixu fika ta da vólta pa riba di se kabésa. I Maria fika txeu tristi.

image

Di rapenti, kontise un kuza!

Maria odja Kiara ta bota kaska di banana na strada.

El poi Kiara panha kel kaska di banana i bota-l na lixu.

image

Na kel otu dia, kel núven di lixu staba más pikinoti.

Maria ka sabeba modi ki kel-la kontise.

Maria staba ta djobe pa janéla i dirapenti el odja se tia ta bota bólsas di plástiku na txon. Maria pidi se tia pa el bota kes bólsa na lixu.

Na kel otu dia, kel núven di lixu bira inda más pikinoti.

Gósi Maria sabeba kuzê ki el tinha ki faze!

image

Maria ka dexa pesoas bota lixu na txon. El ta fikaba sienti pa tudu lixu podu déntu kontentor. Ses zóna fika más linpu. 

I un dia, kel núven di lixu ka staba más pa riba di se kabésa. Maria bira minina más filís di mundu.

image

Maria nunka más ka bota lixu na txon.

image

El staba ta gosta di mora na un zóna linpu.

image

Lenbra!

Nu ka debe bota lixu na kalker lugar ki nu krê.

image

Sénpri buska un kontentor ô lata di lixu pa bu bota lixu na el.

image

É ka tudu kuza ki é lixu.

Nu ka meste bota tudu kuza. Alvês nu pode torna uza alguns kuza sima bólsa di plástiku i garafas.

Credits

Un Núven di Lixu is translated by Learn Kabuverdianu. The © for this translation lies with Learn Kabuverdianu, 2020. Some rights reserved. Released under CC BY 4.0 license. Derived from: 'A Cloud of Trash', by Sangeeta Velegar. © Sangeeta Velegar , 2017. Some rights reserved. Released under CC BY 4.0 license. Based on Original story: 'A Cloud of Trash', by Karanjeet Kaur, illustrated by Bhavana Vyas Vipparthi. © Pratham Books , 2017. Some rights reserved. Released under CC BY 4.0 license. This story may have intermediate versions between the root and parent story. To see all versions, please visit the links.

Relevelled by Sangeeta Velegar

Original story: A Cloud of Trash', by Karanjeet Kaur

Illustrated by Bhavana Vyas Vipparthi 

Published By StoryWeaver Community