Undi ki Lina Sta?

Mamá sta ta txoma-m. N ten ki sukundi!

Se mai txoma-l: "Lina ... Liiinaaaa, undi ki bu sta? Nu ten ki bai!" Lina kumesa ta kóre faxi pa el bai sukundi.

Undi ki Lina sta? El sta baxu sofá? El sta tras di kurtina? Bu sabe undi ki Lina sta?

Undi ki Lina sta? El sta pértu di fogon? El sta déntu armáriu? Bu sabe undi ki Lina sta?

Se mai fika ta txoma-l. "Lina ...Liiiinaaaaa. Nu ten ki bai. Undi ki bu sta?" Bu sabe undi ki Lina sta?

Se mai fla: "dja N atxa-u!" Lina sai di baxu kama i fla: "N ka krê bai!"

Se mai fla-l ku un vós kalmu: "Lina, nu ten ki bai". Lina responde: "N ka krê bai, N gosta txeu di kel livru li!"

Lina kumesa ta txora. Se mai fla-l: "má Lina, si nu bai pa bibliotéka bu pode atxa otus livru ki bu ta gosta."

Lina obi ku se mai i es bai pa bibliotéka. Lina gostaba txeu di bai pa bibliotéka, má tanbê el gostaba txeu di kel livru ki el nprista.

Kantu es txiga bibliotéka Lina panha un livru kor burmedju i el kumesa ta lé. Lina fla: "N gosta txeu di kel livru li!"

El panha un otu livru. El kumesa ta lé i dipôs el fla: "N gosta di kel livru li tanbê."

El panha otus livru i el kumesa ta lé. Lina fla: "N gosta di kel livru li i di kel-li, i tanbê di kel-li."

Tudu livru ki el lé, el gosta.

Se mai fla-l: "odja Lina, ben bibliotéka é sábi. Óras ki bu traze un livru ki bu nprista bu pode leba otus livru ki bu gosta pa kaza."

Lina fika rei di kontenti i el fla: "uau ki fixi!"

Lina fika ku monti livru. Bu sabe undi ki Lina sta?