Nu Ben Faze Sumu di Limon!

Dipôs di skóla nu gosta di brinka djuntu.

Óras ki sta txeu kalor, tiu di Lukas ta dexa-nu sumu di limon riba kadera.

Má modi ki nu ta konsigi dividi sumu di limon entri nos oitu?

Lukas tene un padás di linha ki nu pode uza pa faze sinal na jaru.

Primeru nu uza kel padás di linha pa nu midi jaru. Sugundu, nu dobra linha déntu meiu. Dipôs nu dobra linha déntu meiu más dôs bês. Asi, nu fika ku oitu párti igual. Nu uza kel-la pa nu faze sinal na jaru.

Pedru i Sara dividi sumu di limon ku kuidadu na kópu di nos tudu.

Kel sumu staba rei di sábi i nos tudu kreba más. Tiu di Lukas fla ma nu pode uza se reseta pa faze más sumu di limon.

Reseta: Sumu di Limon: 1 kópu di asukra, Sumu di 2 limon, 7 Kópu di agu, Mexe dretu i sirbi!

Nu tene agu, asukra i limon. Má nu ka tene kópu di midida.

Polu fla: dja nu fazeba oitu marka na jaru, nu pode faze más dôs, asi nu ta fika ku dés. Nu pode uza kes sinal pa faze midida.

Sara, Pedru, i Lukas faze kada marka ku kuidadu.

Dipôs nu kumesa ta faze sumu di limon. Nu poi sumu di dôs limon ti primeru marka, asukra ti tirseru marka i agu ti kel últimu marka.

Nu mexe-l dretu i nu dividi sumu di limon entri nos oitu.

Inda nu fika ku más un poku di sumu di limon ki nu da pa tiu di Lukas. El gosta txeu di nos sumu di limon. El fika kontenti.

Nos tanbê nu fika txeu kontenti! Gósi nu sabe faze sumu di limon.

Atividadi:Kantu mininus staba ta brinka djuntu? Kantu ki éra matxu? Kantu ki éra fémia?

Korta un limon na oitu padás igual. Kantu padás ta faze metadi di limon?

Da bu amigu(a) metadi di limon. Kantu padás ki bu ta da-l?