Djuntu ku bo, Mamá!
Djuntu ku bo, Mamá!

Djuntu ku bo, Mamá!

Adasa ka ta faze nada sen se mai: el ka ta ruma se maléta, el ka ta bai brinka, nen el ka ta bai pâsia. Má na es viaji Adasa ta ben prende faze kuzas el sô.

image

Adasa fla se mai: "Djuntu ku bo mamá!"

Mai di Adasa krê pa Adasa bai ruma se ropa na se maléta. Es sta bai vizita ilha di Son Nikulau. Se mai fla-l: "Pamodi ki bu ka ta tenta ruma bu mala bo sô?" Adasa kontinua na se ladu.

image

"Djuntu ku bo mamá!"

Mai di Adasa sta ta kunpra pasaji. Adasa kóre faxi pa el bai fika djuntu ku se mai.

Ilha di Son Nikulau é lonji! Primeru, nu bai na un avion dipôs na un karu i gósi na un barku.

É un barku grandi. Sta txeu algen ki ta ba viaja na el i tudu algen sta kontenti. Águ sta pa tudu ladu.

image

Adasa fla: "Djuntu ku bo mamá!"

Adasa bai na móta sima se mai. Es ta ba fika na un skóla pa dôs dia.

image

Na kel otu dia Adasa ku se mai sai pa konxe kes algen na vizinhansa.

Oi! Ami é Ani i kel-li é nha irman Lidiani. Lidiani fla Adasa: "Oi, bu krê ben brinka ku nos? Ben!"

image

Adasa fla: "Djuntu ku bo mamá!"

image

Es bai brinka djuntu i na poku minutu Adasa ku Ani bira midjoris amiga. "Mamá odja-m li!"

Es salta di un tronku pa kel otu.

Es subi na un kabalu di madera.

Es brinka na areia.

I es brinka ku bisikléta di madera.

image

"Mamá, odja-m!" Es kóre i es abri tornera di agu. Es brinka na agu.

Se mai fla: "Adasa dja sta na óra di kume!" Adasa fla: "Da-m kumida mamá!" Es kume arôs ku pexi.

image

Góta di txuba kumesa ta kai di séu.

Ani fla Adasa: "Nu sta ta bai pa riu, nu bai."

image

Mai di Adasa odja Adasa ku se novus amigu ta ben di riu. Es staba tudu kontenti. Es staba ta ri i ta kume sinbron.

image

Na kel otu dia, Adasa ku se mai pripara pa es volta pa kaza. Se mai fla-l: "Adasa dexa-m djuda-u kalsa sapatu."

image

"Dexa-m Mamá, N ta kalsa mi sô!"

image
Credits

This story: Djuntu ku Bo, Mamá! is translated by Learn Kabuverdianu. The © for this translation lies with Learn Kabuverdianu, 2020. Some rights reserved. Released under CC BY 4.0 license. Based on Original story: 'With You, Ma', by Adith A.K. illustrated by Amalendu Kaushik. © Pratham Books , 2020. Some rights reserved. Released under CC BY 4.0 license. Published By StoryWeaver Community

Translated by Learn Kabuverdianu

Original story: With You, Ma by Adith A.K.

Illustrated by Amalendu Kaushik

Published By StoryWeaver Community