Aventura na Mar

Un dia Lukas durmi timenti el staba ta piska. El staba ta spéra pa pexi kume arós ki el staba ta uza sima iska.

Dirapenti, bara di péska di Lukas kumesa ta treme! El korda kel óra. Kel-li é kuzê?

Un kriatura staba ta luta pa skapa di bara di péska!

Kel kriatura puxa i puxa bara ku txeu forsa ti ki Lukas kai déntu di águ.

Kel kriatura puxa-l pa fundu di mar. Lukas odja ma kel kriatura éra un kobra grandi di mar!

Lukas odja txeu tipu di animal ki ta vive na mar.

Lukas ku kel kobra di mar nada tudu djuntu.

Kel kobra leba Lukas ti un rótxa i el fla-l: "Nha ovu sta prézu baxu di kel pédra grandi li."

Lukas pintxa i pintxa ku forsa, má pédra éra pizadu dimás pa sai di kel lugar! Nton Lukas tevi un ideia. El abri se saku di arós ki staba na se onbru.

Kes animal di mar ki staba pértu di es, nada ti Lukas pa bai kume arós. Lukas pidi tudu kes animal di mar ki kreba kume arós pa djuda-s tra ovu di baxu di kel pédra grandi.

Tudu animal fla ma es ta djuda. Nton es bai pa rótxa pa kumesa trabadju.

Kantu es txiga na kel pédra grandi, es pintxa i es kontinua ta pintxa ku tudu ses forsa.

Dipôs di txeu sforsu es konsigi tra kel pédra grandi di kel lugar. Lukas odja kel ovu ki ten txeu valor!

Lukas stika mô i ku kuidadu el tra kel ovu di la.

Kel ovu kumesa ta sakudi i ta treme! Kuzê ki sta kontise?

Di kel ovu sai un kobra di mar pikinoti. El staba suguru! Kel kobra grandi fika txeu kontenti. Lukas ku kes otu animal tanbê fika kontenti.

Ku txeu emoson, Lukas fika kansadu i el kaba pa durmi. Kel kobra grandi di mar karega-l na se kósta ku txeu kuidadu.

Lukas torna korda na béra di mar. El odja se baldi ki staba vaziu xeiu di pexi. Éra tudu un sonhu?